దేశవ్యాప్తంగా అసంఘటిత రంగంలో పనిచేస్తున్న లక్షలాది మంది కార్మికులకు కేంద్ర ప్రభుత్వం గుడ్ న్యూస్ చెప్పింది. వృద్ధాప్యంలో ఆదాయ భద్రత కల్పించే లక్ష్యంతో అమలులో ఉన్న అటల్ పెన్షన్ యోజనను మరోసారి పొడిగిస్తూ కీలక నిర్ణయం తీసుకుంది. ఈ పథకాన్ని 2030–31 ఆర్థిక సంవత్సరం వరకు కొనసాగించేందుకు కేంద్ర మంత్రివర్గం అధికారికంగా ఆమోదం తెలిపింది. అలాగే ఈ పథకానికి సంబంధించి ప్రచార కార్యక్రమాలు, అవగాహన పెంచే చర్యలు, సామర్థ్య నిర్మాణం, అవసరమైన చోట గ్యాప్ ఫండింగ్ అందించేందుకు కూడా కేంద్ర ప్రభుత్వం నిధుల మద్దతు ఇవ్వనుంది. ప్రధానమంత్రి నరేంద్ర మోదీ అధ్యక్షతన జరిగిన కేంద్ర కేబినెట్ సమావేశంలో ఈ నిర్ణయం తీసుకున్నారు. దీని ద్వారా అసంఘటిత రంగ కార్మికులు, రోజువారీ కూలీలు, స్వయం ఉపాధి పొందేవారు, చిన్న వ్యాపారులు వంటి వారికి రిటైర్మెంట్ తర్వాత కూడా నెలవారీ పెన్షన్ అందే భరోసా కొనసాగనుంది. ఇప్పటికే దేశవ్యాప్తంగా కోట్లాది మంది ఈ పథకం ద్వారా లబ్ధి పొందుతుండగా, తాజా నిర్ణయంతో మరింత మంది ఈ స్కీమ్లో చేరే అవకాశాలు పెరుగుతాయని కేంద్ర ప్రభుత్వం భావిస్తోంది. అసంఘటిత రంగంలో పనిచేసే కార్మికులకు వృద్ధాప్య ఆదాయ భద్రత కల్పించాలనే ఉద్దేశంతో 2015 మే 9న అటల్ పెన్షన్ యోజనను కేంద్ర ప్రభుత్వం ప్రారంభించింది. అప్పటినుంచి ఈ పథకం దేశవ్యాప్తంగా విస్తృత ఆదరణ పొందింది. ప్రభుత్వ గణాంకాల ప్రకారం 2026 జనవరి 19 నాటికి 8.66 కోట్లకు పైగా చందాదారులు ఈ పథకంలో నమోదు చేసుకున్నారు. ఇది పథకం ఎంతటి ప్రజాదరణ పొందిందో స్పష్టంగా తెలియజేస్తోంది.
More Articles Like This
- Advertisement -
