గణేష్ నవరాత్రి ఉత్సవాలు చివరి దశకు చేరుకున్నాయి. భక్తులు విఘ్నేశ్వరుడి విగ్రహాలను నిమజ్జనం చేస్తూ భక్తిశ్రద్ధలతో కొనసాగుతున్నారు. అయితే నిమజ్జనం సమయంలో విగ్రహాల ఫొటోలు, వీడియోలు తీసి సోషల్ మీడియాలో షేర్ చేసే అలవాటు కొంతమందికి ఉంది. ఈ నేపథ్యంలో మహారాష్ట్ర పూణే పోలీసులు కీలక నిర్ణయం తీసుకున్నారు. పూణే పోలీసులు ప్రకటించిన ప్రకారం, సెప్టెంబర్ 4 నుండి 15 వరకు జరిగే గణేష్ విగ్రహాల నిమజ్జనం సమయంలో చిత్రాలు తీయడం, వీడియోలు రికార్డు చేయడం మరియు వాటిని సోషల్ మీడియాలో పంచుకోవడం నిషేధం. ఈ నిషేధాన్ని ఉల్లంఘించే వారిపై ఇండియన్ సివిల్ సెక్యూరిటీ కోడ్ సెక్షన్ 163 ప్రకారం చర్యలు తీసుకుంటామని హెచ్చరించారు. నిమజ్జన దృశ్యాలను ప్రసారం చేయడం మతపరమైన మనోభావాలను దెబ్బతీయవచ్చని అధికారులు పేర్కొన్నారు. ఇలాంటి చర్యలు ప్రజా శాంతి భద్రతలకు భంగం కలిగించే అవకాశముందని స్పష్టం చేశారు. ఈ నిర్ణయం పూర్తిగా సామాజిక శాంతి, మత సామరస్యాన్ని కాపాడేందుకు తీసుకున్నదని తెలిపారు. పూణేలో విగ్రహాల నిమజ్జనం శనివారం నుంచి పెద్ద ఎత్తున జరగనుంది. ఈ సందర్భంగా పోలీసులు కఠినమైన పర్యవేక్షణ చేపట్టనున్నారు.
More Articles Like This
- Advertisement -
