ఆంధ్రప్రదేశ్ రాష్ట్రంలో జరుగుతున్న తొలి విడత గ్రామ పంచాయతీ ఎన్నికల నామినేషన్ల స్వీకరణ ప్రక్రియ నేటి సాయంత్రం 5 గంటలతో ముగియనుంది. చివరి రోజు కావడంతో గ్రామాల్లో రాజకీయ వాతావరణం వేడెక్కింది మరియు ఆశావహులు పెద్ద సంఖ్యలో తమ నామినేషన్ పత్రాలను దాఖలు చేసేందుకు సిద్ధమవుతున్నారు. నామినేషన్ల స్వీకరణ పూర్తయిన వెంటనే రేపు పత్రాల పరిశీలన చేపట్టి నిబంధనలకు విరుద్ధంగా ఉన్న వాటిని అధికారులు తిరస్కరించనున్నారు.
తిరస్కరణకు గురైన అభ్యర్థులు ఈ నెల 19వ తేదీన ఆర్డీవో కార్యాలయంలో అప్పీల్ చేసుకునే అవకాశం కల్పించారు. ఆ అప్పీళ్లను 20వ తేదీన పరిష్కరించిన అనంతరం నామినేషన్ల ఉపసంహరణకు 21వ తేదీ వరకు గడువు ఉంటుంది. అదే రోజు బరిలో నిలిచే తుది అభ్యర్థుల జాబితాను అధికారులు ప్రకటిస్తారు. ఈ నెల 26వ తేదీన పోలింగ్ నిర్వహించి అదే రోజు సాయంత్రం ఓట్ల లెక్కింపు పూర్తి చేసి ఫలితాలను వెల్లడించనున్నారు.

