రేపే స్థానిక ఎన్నిక‌ల నోటిఫికేష‌న్‌!

తెలంగాణలో స్థానిక సంస్థల ఎన్నికలకు సంబంధించి రాష్ట్ర ఎన్నికల కమిషన్ రేపు (గురువారం) ఉదయం 10:30 గంటలకు నోటిఫికేషన్ విడుదల చేయనుంది. బీసీ రిజర్వేషన్లపై తెలంగాణ హైకోర్టులో విచారణ రేపటికి వాయిదా పడినప్పటికీ, నోటిఫికేషన్ ప్రక్రియ యథావిధిగా కొనసాగనుంది. హైకోర్టులో బీసీ రిజర్వేషన్లపై పిటిషన్లపై సుదీర్ఘ వాదనలు జరిగాయి, కానీ నోటిఫికేషన్‌ను ఆపాలన్న పిటిషనర్ వాదనలను కోర్టు పరిగణనలోకి తీసుకోలేదు. రేపటి నోటిఫికేషన్ 31 జిల్లాల్లోని 565 మండలాలకు సంబంధించి 5,749 ఎంపీటీసీ, 565 జడ్పీటీసీ స్థానాలకు వర్తిస్తుంది. ఎన్నికలు రెండు విడతల్లో జరగనున్నాయి. మొదటి విడతలో 2,963 ఎంపీటీసీ, 292 జడ్పీటీసీ స్థానాలకు నామినేషన్లు అక్టోబర్ 9 నుంచి 11 వరకు స్వీకరిస్తారు. పోలింగ్ అక్టోబర్ 23న, ఓట్ల లెక్కింపు నవంబర్ 11న జరుగనుంది. హైకోర్టు విచారణ తర్వాత అడ్వకేట్ జనరల్ సుదర్శన్ రెడ్డితో మంత్రులు పొన్నం ప్రభాకర్, కొండా సురేఖ, వాకిటి శ్రీహరి, ఇతర నేతలు సమావేశమై, రేపటి విచారణకు సంబంధించి చర్చించారు.