తెలంగాణ‌లో బీసీలకు స్థానిక సంస్థలు, విద్య, ఉద్యోగాల్లో 42 శాతం రిజర్వేషన్లు కల్పించే అంశంపై రాష్ట్ర ప్రభుత్వం దూకుడు పెంచింది. ఈ మేరకు రాష్ట్ర శాసనసభ ఆమోదించిన రెండు బిల్లులకు వెంటనే చట్టబద్ధత కల్పించాలని రాష్ట్రపతి ద్రౌపది ముర్మును కోరాలని మంత్రిమండలి నిర్ణయించింది. డాక్టర్ బీఆర్ అంబేద్కర్ తెలంగాణ రాష్ట్ర సచివాలయంలో ముఖ్యమంత్రి రేవంత్ రెడ్డి అధ్యక్షతన జరిగిన మంత్రిమండలి సమావేశంలో ఈ అంశంపై సుదీర్ఘంగా చర్చ జరిగింది. గత మార్చిలో శాసనసభ ఆమోదించిన రెండు బిల్లులు గవర్నర్ ద్వారా రాష్ట్రపతికి పంపించబడ్డాయి. అయితే, స్థానిక సంస్థల ఎన్నికల గడువు దగ్గరపడుతున్న నేపథ్యంలో బిల్లులు పెండింగ్‌లో ఉండటంతో ప్రభుత్వం కసరత్తు ప్రారంభించింది. ఆగస్టు 5, 6, 7 తేదీల్లో ముఖ్యమంత్రి రేవంత్ రెడ్డి నేతృత్వంలో మంత్రులు, ఎంపీలు, ఎమ్మెల్సీలు, ఎమ్మెల్యేలతో పాటు బీసీ సంఘాల ప్రతినిధులు ఢిల్లీ వెళ్లి రాష్ట్రపతిని నేరుగా కలిసి విజ్ఞప్తి చేయనున్నారు. ఈ నిర్ణయాలను మంత్రులు పొన్నం ప్రభాకర్, కొండా సురేఖ, వాకిటి శ్రీహరి మీడియాకు వెల్లడించారు. ప్రభుత్వం రిజర్వేషన్ల సాధనలో చిత్తశుద్ధితో ఉందని, అన్ని పార్టీలు ఈ విషయంలో సహకరించాలని మంత్రులు పిలుపునిచ్చారు.
More Articles Like This
- Advertisement -
