తెలంగాణతో గొడవ అవసరం లేదు – సీఎం చంద్రబాబు

తెలంగాణతో విభేదాలు పెంచుకోవాల్సిన అవసరం లేదని ఆంధ్రప్రదేశ్ ముఖ్యమంత్రి నారా చంద్రబాబు నాయుడు స్పష్టం చేశారు. “హైదరాబాద్‌ను అభివృద్ధి చేసింది నేను. అదేలా అమరావతిని కూడా అభివృద్ధి చేయడం నా బాధ్యత” అని ఆయన పేర్కొన్నారు. గోదావరి నీటిని రెండు రాష్ట్రాలూ వినియోగించుకుంటున్న నేపథ్యంలో, ప్రధాని మోదీ నదుల అనుసంధానాన్ని ప్రోత్సహిస్తున్నారని గుర్తు చేశారు. వేదవతి ప్రాజెక్టును పూర్తి చేస్తామని, ప్రస్తుతం కుప్పం వరకే చేరుతున్న హంద్రీనీవా నీటిని వచ్చే ఏడాది చిత్తూరు వరకూ తీసుకెళ్లేలా చూస్తామని హామీ ఇచ్చారు. అలాగే, 2021లో పోలవరాన్ని గోదావరిలో ముంచేశారని తీవ్ర విమర్శలు చేశారు. రాష్ట్ర ప్రజల ఆకాంక్షలు గణనీయంగా పెరిగాయని, ఖజానా ఖాళీగా ఉన్నప్పటికీ అభివృద్ధి పనులకు సమయం అవసరమని సీఎం చంద్రబాబు తెలిపారు. “భూతం మళ్లీ వస్తుందేమోనన్న భయాలు ప్రజల్లో ఉన్నాయి. ఆ భూతాన్ని భూస్థాపితం చేయడం నా బాధ్యత. కులం కేవలం కూడు పెడుతుంది, మతం ఒక విశ్వాసం మాత్రమే” అని వ్యాఖ్యానించారు. ప్రజల ఆధ్యాత్మిక విశ్వాసాల్ని గౌరవిస్తూ, అన్ని మతాలకు విలువ ఇచ్చే దృక్కోణం తనదన్నారు. తన యత్నాలను కొందరు అడ్డుకుంటున్నారని విమర్శిస్తూ, “కొంతమంది రాక్షసులు నా యజ్ఞాన్ని భగ్నం చేయాలని చూస్తున్నారు” అంటూ మండిపడ్డారు. రాష్ట్ర అభివృద్ధికి ఒక్క ఆయన పరిగెత్తితే సరిపోదని, తన నాయకులను కూడా నడిపిస్తున్నానని తెలిపారు. “కొంతమంది రాయలసీమను ఓట్ల కోసమే వినియోగించారు. అయితే నాకు రాయలసీమ అంటే నీళ్లు, మీ భవిష్యత్తు” అని పేర్కొన్నారు. రైతులకు శుభవార్త తెలిపిన సీఎం చంద్రబాబు, “కేంద్రం రైతు భరోసా విడుదల చేసిన అదే రోజున మన వంతు మొత్తం కూడా జమ చేస్తాం. ఆగస్టు నాటికి రైతుల ఖాతాల్లో డబ్బులు చేరతాయి” అన్నారు. అలాగే, ఆగస్టు 15 నుంచి మహిళలకు ఉచిత బస్సు ప్రయాణం అందుబాటులోకి రానుందని వెల్లడించారు. అలాగే, అదే తేదీ నుంచి వాట్సాప్ గవర్నెన్స్‌ ద్వారా 700 ప్రభుత్వ సేవలు అందుబాటులోకి తీసుకొస్తామని తెలిపారు. అంతేకాక, ఆగస్టు 20వ తేదీ వరకు రాష్ట్రవ్యాప్తంగా 16,500 టీచర్లను స్కూళ్లకు పంపించనున్నట్లు వెల్లడించారు. గత పాలనలో ఒక్క టీచర్ పోస్టు భర్తీ చేయలేదని విమర్శించారు.