గత కొన్ని వారాలుగా యుద్ధ మేఘాలతో అట్టుడికిపోతున్న మధ్యప్రాచ్యంలో ఒక్కసారిగా శాంతి గాలులు వీస్తున్నాయి. అమెరికా-ఇరాన్ మధ్య భీకర దాడులు, ప్రతిదాడులతో ప్రపంచం మూడో ప్రపంచ యుద్ధం వైపు వెళ్తోందా అన్న ఆందోళనల మధ్య అమెరికా అధ్యక్షుడు డొనాల్డ్ ట్రంప్ కీలక ప్రకటన చేశారు. ఇరాన్తో శాంతి చర్చలు ప్రారంభమయ్యాయని, గత రెండు రోజులుగా సాగుతున్న ఈ చర్చలు అత్యంత ఫలప్రదంగా ఉన్నాయని ఆయన వెల్లడించారు. ఈ నేపథ్యంలో ఇరాన్లోని కీలకమైన విద్యుత్ కేంద్రాలు, ఇంధన మౌలిక సదుపాయాలపై జరపాల్సిన దాడులను ఐదు రోజుల పాటు వాయిదా వేయాలని తన దేశ రక్షణ శాఖను ట్రంప్ ఆదేశించారు.
ట్రంప్ సోషల్ మీడియా పోస్ట్: శాంతికి బాటలు
అధ్యక్షుడు ట్రంప్ తన సొంత సోషల్ మీడియా వేదిక ‘ట్రూత్ సోషల్’ ద్వారా ఈ శుభవార్తను ప్రపంచానికి తెలియజేశారు. “మిడిల్ ఈస్ట్లో నెలకొన్న వైరుధ్యాలకు శాశ్వత పరిష్కారం కనుగొనే దిశగా గత రెండు రోజులుగా అమెరికా, ఇరాన్ ప్రతినిధుల మధ్య చర్చలు జరుగుతున్నాయి. ఈ చర్చలు చాలా ఆశాజనకంగా ఉన్నాయి. ఈ వారం పొడవునా ఇవి కొనసాగే అవకాశం ఉంది. చర్చల తీరును గమనించిన తర్వాత, ఇరాన్పై ప్లాన్ చేసిన అన్ని రకాల సైనిక దాడులను ఐదు రోజుల పాటు నిలిపివేయాలని నేను డిపార్ట్మెంట్ ఆఫ్ వార్ను ఆదేశించాను” అని ఆయన పేర్కొన్నారు. ఈ ప్రకటనతో ఒక్కసారిగా యుద్ధ టెన్షన్లు తగ్గుముఖం పట్టాయి.
