కర్నూలు బస్సు ప్రమాదం దర్యాప్తుకు 16 బృందాలు

కర్నూలు జిల్లాలో హైదరాబాద్ నుంచి బెంగళూరు వెళ్తున్న వేమూరి కావేరి ట్రావెల్స్ బస్సు ప్రమాదంలో 19 మంది సజీవ దహనమయ్యారు. బైక్‌ను ఢీకొనడంతో మంటలు చెలరేగి బస్సు దగ్ధమైందని అధికారులు తెలిపారు. ఈ ఘటనలో మృతుల్లో ఆంధ్రప్రదేశ్, తెలంగాణ నుంచి ఆరుగురు చొప్పున, తమిళనాడు, కర్ణాటక నుంచి ఇద్దరు చొప్పున, ఒడిశా, బిహార్ నుంచి ఒక్కొక్కరు ఉన్నారు. ఒక మృతదేహం గుర్తింపు కావాల్సి ఉంది. మంత్రులు అనిత, రాం ప్రసాద్ రెడ్డి కర్నూలు వ్యాస్ ఆడిటోరియంలో మీడియాతో మాట్లాడుతూ, బస్సులో 43 మంది ప్రయాణికులు ఉన్నట్లు వెల్లడించారు. 27 మంది, ఇద్దరు డ్రైవర్లతో సహా, స్వల్ప గాయాలతో బయటపడ్డారు. 12 మంది ఆస్పత్రుల్లో చికిత్స పొందుతున్నారు. పోలీసులు డ్రైవర్లను అదుపులోకి తీసుకొని విచారిస్తున్నారు. డ్రైవర్ సమాచారం ప్రకారం, రోడ్డుపై పడి ఉన్న బైక్‌ను బస్సు ఢీకొనడంతో మంటలు చెలరేగాయని కర్నూలు ఎస్పీ విక్రాంత్ పాటిల్ తెలిపారు. ప్రమాద కారణాలను తెలుసుకునేందుకు 16 బృందాలతో దర్యాప్తు జరుగుతోంది. డీఎన్‌ఏ పరీక్షల కోసం 10 బృందాలు, కారణాల విశ్లేషణకు 4 బృందాలు, రసాయన పరీక్షల కోసం 2 బృందాలు ఏర్పాటయ్యాయి. మృతదేహాలు గుర్తించలేనంతగా కాలిపోవడంతో, డీఎన్‌ఏ పరీక్షల ద్వారా గుర్తింపు చేసి కుటుంబ సభ్యులకు అప్పగిస్తామని అధికారులు తెలిపారు. ఏపీ ప్రభుత్వం మృతుల కుటుంబాలకు రూ.5 లక్షలు, క్షతగాత్రులకు రూ.2 లక్షల ఆర్థిక సాయం ప్రకటించింది.